Кӗрхи каникул кунӗсем
Кӑмӑлласах шкула килетпӗр,
Тем тӗрлӗ ӗҫ те ирттеретпӗр!
Тунти кун йывӑр кун пулнине ӗненмеҫҫӗ Л.В. Пучков ячӗллӗ Чӑрӑшкасси шкулӗн вӗренекенӗсем. Вӗсемшӗн паянхи кун тухӑҫлӑ та хаваслӑ! Кӗрхи каникулӑн пӗрремӗш кунӗнче шкулти лагере ҫӳрекенсем, "Ман тӑван тавралӑх" краеведени кружок ачисем тата сцена ӑсталӑхне юратакансем, хамӑр тӑрӑха ытларах тӗпчес, ун ҫинчен нумайрах пӗлес тесе экскурисире пулчӗҫ. Вӗсем хаваслансах Чӑрӑшкасси территори пуҫлӑхӗ Матьянов Евгений Вячеславович патне те ҫитрӗҫ.
Евгений Вячеславович шкул ачисене хамӑр таврари ялсен историйӗпе паллаштарчӗ, ҫавӑн пекех паллӑ, пултаруллӑ, ӗҫре чапа тухнӑ мухтавлӑ ентешсем пирки каласа пачӗ. Ачасемшӗн 2006 ҫулта Тӑрӑн тӑрӑхӗпе Чӑрӑшкасси енӗ пӗрлешни те кӑсӑклӑ пулчӗ. Хамӑр тавралӑха карттӑ ҫинче курса тишкерчӗҫ, тӗрлӗ ыйтусем ҫине хурав тупрӗҫ. Кружока ҫӳрекенсем кружок ертӳҫисем, шкул администрацийӗ усӑллӑ та пуян содержаниллӗ тӗл пулушӑн Евгений Вячеславовича тав сӑмахӗ калаҫҫӗ.
Хаваслӑ ҫул ҫӳрев хыҫҫӑн кадет класӗсенчи ачасем ӗҫ планӗпе килӗшӳллӗн тӗрлӗ хӑнӑхтарусем турӗҫ. Чӑн-чӑн патриот пулма мӗн пӗлмелле? Тӗрлӗ ӑмӑрту-конкурссенче мала тухас тесен мӗн тумалла? Ҫак ыйтусен хуравне пирӗн шкул ачисем аван чухлаҫҫӗ. Ҫӗр-шывӑн пулас хӳтӗлевҫисем, ҫамрӑк кадетсем каникулта вӑхӑта сая ямаҫҫӗ, Матьянов Александр Вячеславович ертсе пынипе палӑртнӑ тӗллевсене пурнӑҫлама тӑрӑшаҫҫӗ.
Кружок ертӳҫи Николаева А.М. тата кадетсемпе тӑрӑшакан
Матьянов А.В.