Ҫапла пӗтӗмлетӳ турӗҫ паян Шупашкар муниципалитет тӑрӑхӗн Л.В. Пучков ячӗллӗ Чӑрӑшкасси шкулӗнчи 5 тата 6 класра вӗренекенӗсем. Кӳршӗллӗ Элӗк тӑрӑхӗнчи Тури Вылӑ ялӗнче 100 ҫул каялла авӑнӑн 14-мӗшӗнче ҫуралса ӳснӗ, чӑваш литературинче тарӑн йӗр хӑварнӑ Александр Артемьев ҫыравҫӑн кун-ҫулӗпе, ӗҫӗ-хӗлӗпе урокра кӑна мар, шкул вулавӑшӗнче те тӗплӗн паллашрӗҫ. Паллӑ ҫыравҫӑн тӗрлӗ кӗнеки хушшинче чи кӑсӑкли "Салампи" пулнине палӑртрӗҫ. 5 класри Марзия Сандалова асӑннӑ хайлав сыпӑкне вуласа пама кӑмӑл турӗ, 6 класри Роман Крылов ӑста прозаик, поэт, критик, куҫаруҫӑ , халӑх писателӗн тӑван ялне Чӑваш республикин картти ҫинче чи малтан шыраса тупма пултӑрчӗ.