Л.В. Пучков ячӗллӗ Чӑрӑшкасси шкулӗнче вӗренекенсем вӗренӳ ҫулӗ вӗҫленнине кунсеренех тӗрлӗ экскурсире пулса уявлаҫҫӗ. Паян вӗсем Ишлей салинчи канупа вӑйӑ лаптӑкӗнче пулса савӑнчӗҫ, каярах салари кинозалра " Битва за Севастополь" ятлӑ документлӑ фильма пӑхса сӳтсе яврӗҫ. 1944 ҫулта нимӗҫ фашисчӗсенчен Севастополь хулине мӗнлерех хӑтарнине чӗррӗн кӑтартакан фильма Юрий Левитан каласа пани пурин чунне те хускатрӗ. Хура-шурӑ фильм лентинчи вӑрҫӑ саманчӗсем паянхи ҫамрӑк ӑрӑвӑн мӑн аслашшӗсемпе кукашшӗсен паттӑрлӑхне тепӗр хут курса ӗненме май пачӗ. Асӑннӑ кинона куракан кашни ача тӑван ҫӗршыва яланах хӳтӗлеме хатӗр пулса ӳсмеллине , ҫӗршывӑмӑрӑн паянхи паттӑрӗсене хисеп тумаллине ӑнланчӗ.