Эпӗ паттӑр ветеранӑн кӗҫӗн мӑнукӗ. Манӑн аттен кукашшӗ, Миронов Николай Миронович, Комсомольски тӑрӑхӗнчи Хирти Мӑрат ялӗнче ҫуралнӑ. Вӑрҫӑ пуҫланнӑ ҫул вӑл 16 ҫулхи ҫамрӑк пулнӑ. Вӑрҫӑн иккӗмӗш ҫулӗнче Тӑван ҫӗр-шыва тӑшмансенчен хӳтӗлес тесе хӑй ирӗкӗпе фронта тухса кайнӑ. Эпӗ питӗ мӑнаҫланатӑп хамӑн мӑн кукаҫипе. Ҫав тери хӑюллӑ та паттӑр пулнишӗн кӑшт тӗлӗнетӗп те. Тӗрӗссипе каласан, эпӗ хам та Тӑван ҫӗрӗм-шывӑма мӑн кукаҫи евӗрех сыхлама хатӗр. Манӑн пичче Артем салтакран таврӑнсан эпӗ те 18 ҫула ҫитсен хӳтӗлевҫӗ пулма ӗмӗтленнине ӑнлантӑм. Унсӑрӑн Аслӑ Аттелӗх вӑрҫӑ хирӗнче миршӗн кӗрешнӗ паттӑр мӑн кукаҫи умӗнче намӑс пулӗ.