Ҫулсерен нарӑсӑн 21-мӗшӗнче Пӗтӗм чӗлхе кунне уявласси йӑлана кӗнӗ Л.В. Пучков ячӗллӗ Чӑрӑшкасси шкулӗнче. Ачасемшӗн Иван Яковлев ҫинчен ӳкернӗ "Дорога к солнцу"фильм фрагменчӗсем питӗ кӑсӑклӑ пулчӗҫ. Шкулта тӗрлӗ халӑх ачисем пӗлӳ илеҫҫӗ. Чӑвашсемпе пӗрлех вырӑссем, таджиксем тата узбексем вӗренеҫҫӗ. 8 класри Максим Степанов, тӗслӗхрен, ашшӗн узбек чӗлхине тӗпчерӗ. Кашни халӑхӑн чӗлхи ашшӗ-амӑшӗ пек ҫывӑх та илемлӗ пулнине палӑртрӗҫ вӗренекенсем. Ҫавӑн пекех тӗрлӗ чӗлхеллӗ словарь туса пӗчӗк тӗпчев ӗҫӗсем ирттерчӗҫ. Вӗренекенсем тӗрлӗ чӗлхеллӗ кӗнеке куравӗ йӗркелерӗҫ: кунта мари, удмурт, нимӗҫ чӗлхисемпе ҫырнӑ кӗнекесене тытса пӑхма, ҫывӑхрах паллашма май пулчӗ. Авар чӗлхипе ҫырнӑ сӑвва та вуласа пӑхрӗҫ. Юлашкинчен ҫапла пӗтӗмлетӳ турӗҫ: тӗнчере тӗрлӗ чӗлхе, анчах кашни хӑй халӑхӗшӗн чи ҫывӑххи, чи юратни. Чӑваш ачисемшӗн тӑван чӗлхе паян уйрӑмах илемлӗ те уҫҫӑн янӑранине палӑртма питӗ кӑмӑллӑ пулчӗ.