Черкесск хулинче "Тӑван чӗлхепе литературӑна чи лайӑх вӗрентекен" конкурсра лауреат ятне тивӗҫнӗ Мӑнал шкулӗнчи Московцева Анжела Юрьевна Л.В. Пучков ячӗллӗ Чӑрӑшкасси шкулӗнчи 5 класс ачисем патӗнче хӑнара пулчӗ. Ку пулӑм ахальтен мар. Вӗрентекенсемшӗн Анжела Юрьевна чи кӗтнӗ хӑна, мӗншӗн тесен конкурсри тӗрлӗ тупӑшура ӑна хавхалантарса тӑчӗҫ, видеосаламсем ячӗҫ, хӑйсем те, ашшӗ-амӑшӗ те сасӑларӗ. Пиллӗкмӗшсем хӑнана чӑваш йӑлипе ҫӑкӑр-тӑварпа, сӑвӑ-юрӑпа, чечексемпе кӗтсе илчӗҫ. Анжела Юрьевна ӑсталӑх лаҫҫипе паллаштарчӗ, конкурс ҫинчен каласа пачӗ, ачасене рэп мелӗпе сӑвӑ вӗренме май пуррипе кӑсӑклантарчӗ, пиллӗкмӗшсем хӑйсем те юрласа пӑхрӗҫ. Тӑван чӗлхене, литературӑна юратса вӗренме сунса каланине тӗслӗх ӗҫ тетрачӗсемпе ҫирӗплетрӗ пирӗн хӑна. Кашни ачана ырӑ сунса, тав туса парнелерӗ, вӗренӳре пысӑк ҫитӗнӳсем тума сӗнчӗ.