Шкул ҫулӗсем пионерсен пӗрлешӗвӗн тӗрлӗ ӗҫ-пуҫӗсемпе асра юлчӗҫ. Шкул дружини пур енӗпе те пӗрремӗшӗсен йышӗнчеччӗ. Пирӗн вӑхӑтрисем кашниех хӗрлӗ галстуклӑ хаваслӑ шкул пурнӑҫне ӑшшӑн аса илет. Маншӑн та вӗсем асран кайми вӑхӑтсем. Пионера кӗнӗ чух пӗрремӗш хут кам галстук ҫыхса янине те ас тӑватӑп. Ҫав галстука паянхи кунччен те юратса, типтерлӗ упратӑп. Унра— ман ачалӑх.Темиҫе галстук туянман эпӗ, комсомола кӗричченех пӗр галстукпа ҫӳренӗ, унӑн тӗсӗ урӑхларах, материалӗ чаплӑрах пулнипе уйрӑлса тӑратчӗ. Тимур командинче пулнӑран тем те тума ӗлкереттӗмӗр: ваттисене пулӑшма, тимӗр- тӑмӑр е кивӗ хут пухма.... Хастар пионер пулнӑ эпӗ. Кӗҫӗннисен вожатӑйӗччӗ, тӗрлӗ мероприяти ертӳҫиччӗ, концертсем те ертсе пыраттӑм, сценарисем те ҫыраттӑм. Пионер дружинин параппанҫи те, хастар ҫамрӑк корреспондент та пулнӑ. Хаҫата-журнала шкул пурнӑҫӗ ҫинчен ҫырса тӑни каярах чӑваш чӗлхипе литература вӗрентекенӗ пулма пулӑшрӗ, ачаранах хамран кӗҫӗннисемпе туслӑ пулни хамӑн вӗренекенсене юратма , вӗсемпе пӗр чӗлхе тупма май пачӗ. Тепӗр тесен, эпӗ паянхи кун та хама пионер пек туятӑп! Ҫулӑм тӗслӗ , ҫил ҫинче вӗл-вӗл вӗҫекен хӗрлӗ галстук инҫет ачалӑха илсе каять, кӑмӑла ҫӗклет.